ഈ വരുന്ന ജൂണിൽ കരാർ അവസാനിക്കുന്ന മുന്നേറ്റ താരം ഡിബാല ഫ്രീ ഏജന്റായി ജുവെന്റസ് വിടാനുള്ള സാധ്യതയേറുകയാണ്. താരത്തിന്റെ കരാർ പുതുക്കാനുള്ള ചർച്ചകൾ ക്ലബ്ബ് അധികൃതർ താരത്തിന്റെ ഏജന്റുമായി നടത്തിയിരുന്നെങ്കിലും, നിലവിലെ സാഹചര്യത്തിൽ പുതിയ കരാറിൽ ഒപ്പുവെക്കണ്ടായെന്നാണ് താരത്തിന്റെ തീരുമാനം.
താരം ഇംഗ്ലീഷ് പ്രീമിയർ ലീഗിലേക്ക് ചേക്കേറുമെന്ന തരത്തിലുള്ള അഭ്യൂഹം കുറച്ചായി ശക്തമാണ്. സ്‌ട്രൈക്കറായും സ്‌ട്രൈക്കറിന് പിന്നിലായും കളിക്കാൻ കഴിവുള്ള താരം, ഫ്രീ ഏജന്റായി ജുവെന്റസ് വിടുകയാണെങ്കിൽ, താരത്തിനായി ഇംഗ്ലീഷ് പ്രീമിയർ ലീഗിലെ വമ്പൻ ക്ലബ്ബുകൾ തന്നെ രംഗത്തുണ്ടാകുമെന്നതിൽ യാതൊരു സംശയവുമില്ല.
സീരി എ കിരീടവും, കോപ്പ ഇറ്റാലിയ കിരീടവും ക്ലബ്ബ് നേടുന്നതിൽ നിർണ്ണായക പങ്കുവഹിച്ച താരത്തെ, 2015 ലാണ് ജുവെന്റസ് പലെർമോയിൽ നിന്ന് സ്വന്തമാക്കുന്നത്. ഈ സീസണിൽ ഇതുവരെ ജുവെന്റസിനായി 29 മത്സരങ്ങളിൽ നിന്നായി 13 ഗോളുകളാണ് താരം നേടിയത്.
Post a Comment