ചാമ്പ്യൻസ് ലീഗ് ഫൈനലിന് ശേഷം ലിവർപൂളിൽ തുടരുമോ ഇല്ലയോയെന്ന് പറയാമെന്ന് പറഞ്ഞ മുന്നേറ്റ താരം മാനെ ഈ സീസണിന് ശേഷം ലിവർപൂൾ വിടുമെന്ന് വ്യക്തമാക്കി. താരം ക്ലബ്ബ് വിടാൻ തീരുമാനിച്ചതായി പ്രമുഖ ജേണലിസ്റ്റായ ഫാബ്രിസിയോ റോമാനോയും റിപ്പോർട്ട് ചെയ്തു.
അടുത്ത സീസണോടെ ലിവർപൂളുമായുള്ള കരാർ അവസാനിക്കുന്ന താരത്തിനെ ടീമിൽ നിലനിർത്താൻ തന്നെയാണ് ക്ലബ്ബിന് ആഗ്രഹമെങ്കിലും, പുതിയ വെല്ലുവിളികൾ സ്വീകരിക്കാനാണ് താരം തീരുമാനിച്ചത് എന്നാണ് ഫാബ്രിസിയോ റിപ്പോർട്ട് ചെയ്തിരിക്കുന്നത്. താരം ഈ സീസണിന് ശേഷം ലിവർപൂൾ വിടുമെന്ന അഭ്യൂഹം ശക്തമായിരുന്നു. ചാമ്പ്യൻസ് ലീഗിന് മുമ്പുള്ള പത്രസമ്മേളനത്തിൽ ഇതേ കുറിച്ച് മാധ്യമ പ്രവർത്തകർ താരതോട് ചോദിച്ചപ്പോൾ എല്ലാത്തിനുമുള്ള ഉത്തരം ഞാൻ ഈ ഫൈനലിന് ശേഷം തരാം എന്നായിരുന്നു മാനെ മറുപടി നൽകിയിരുന്നത്.
സൗത്താംപ്ടണിൽ നിന്ന് ലിവർപൂളിൽ എത്തിയതിന് ശേഷം മുന്നേറ്റ നിരയിലെ ഏറ്റവും പ്രധാനപെട്ട താരമായ മാനെ, ക്ലബിനൊപ്പം ഒരു ചാമ്പ്യൻസ് ലീഗ്, ഇംഗ്ലീഷ് പ്രീമിയർ ലീഗ്, യുവേഫ സൂപ്പർ കപ്പ്, ക്ലബ്ബ് ലോകകപ്പ്, കാരബാവോ കപ്പ് എന്നിവ നേടിയിട്ടുണ്ട്. താരത്തിനായി ബാഴ്സലോണ, ബയേണ്‍ മ്യൂണിക്ക് തുടങ്ങിയ ക്ലബ്ബുകൾ രംഗത്തുണ്ടെങ്കിലും, താരം ബയേണ്‍ മ്യൂണിക്കിലേക്ക് ചേക്കേറാനാണ് കൂടുതൽ സാധ്യത.
Post a Comment