ഒടുവിൽ ലിവർപൂൾ ആഗ്രഹിച്ചത് തന്നെ സംഭവിച്ചു. മുന്നേറ്റ താരം സലാ ലിവർപൂളുമായുള്ള കരാർ പുതുക്കി. ലിവർപൂളുമായി 2025 വരെയുള്ള കരാറിലാണ് സലാ ഒപ്പുവെച്ചത്. 2023 ൽ കരാർ അവസാനിക്കുന്ന താരം അതിന് ശേഷം ലിവർപൂൾ വിടുമെന്ന അഭ്യുഹത്തിനാണ് ഇതോടെ വിരാമമായത്.
മാനെ ക്ലബ്ബ് വിടുകയും, തൻ്റെ ആവശ്യങ്ങൾ അംഗീകരിക്കാതെ ലിവർപൂളുമായുള്ള കരാർ പുതുക്കില്ലായെന്ന് സലാ വ്യക്തമാക്കിയതോടെ, രണ്ട് മികച്ച മുന്നേറ്റ താരങ്ങളെ ഒരുമിച്ച് നഷ്ടപ്പെടുമെന്ന അവസ്ഥയിലായിരുന്നു ലിവർപൂൾ. ഒടുവിൽ താരം കരാർ പുതുക്കാൻ തീരുമാനിച്ചത് ലിവർപൂളിനെ സംബന്ധിച്ച് വളരെ ആശ്വാസകരമായ ഒരു കാര്യമാണ്.
"ഞാൻ വളരെയേറെ സന്തോഷത്തിലാണ്. ലിവർപൂളിൽ ക്ലബ്ബിനൊപ്പം എല്ലാ ട്രോഫികളും നേടിയതിൽ എനിക്ക് സന്തോഷവും ആവേശവും തോന്നുന്നു. എല്ലാവർക്കും ഇത് ഒരു സന്തോഷകരമായ ദിവസമാണ്." - കരാർ പുതുക്കിയന് ശേഷം സലാ പറഞ്ഞു.
റോമയിൽ നിന്ന് 2017ലാണ് സലാ ലിവർപൂളിൽ എത്തുന്നത്. തുടർന്ന് ക്ലബ്ബിനൊപ്പം പ്രീമിയർ ലീഗ്, ചാമ്പ്യൻസ് ലീഗ്, ക്ലബ് വേൾഡ് കപ്പ് തുടങ്ങി ഒട്ടുമിക്ക കിരീടങ്ങളും നേടിയ താരം, ലിവർപൂളിനായി 180 മത്സരങ്ങളിൽ നിന്ന് 118 ഗോളുകൾ നേടിയിട്ടുണ്ട്.
Post a Comment