ഈ സമ്മറോടെ കരാര്‍ അവസാനിക്കുന്ന ചെല്‍സി പ്രതിരോധ താരം അസ്പിലിക്യേറ്റ ബാഴ്‌സലോണയിലേക്ക് ചേക്കേറുമെന്ന് മുൻ ചെൽസി താരം ഫാബ്രിഗാസ്. മാധ്യമ പ്രവര്‍ത്തകന്‍ ജെറാർഡ് റൊമേറോയുടെ ട്വിച്ച് ചാനലിൽ സംസാരിക്കുന്നതിനിടെയാണ് ഫാബ്രിഗാസ്, അസ്പിലിക്യേറ്റ ബാഴ്‌സലോണയിലേക്ക് ചേക്കേറുമെന്ന് പറഞ്ഞത്.
"'അസ്പിലിക്യൂറ്റ ടു ബാഴ്‌സ, അവർ പറയുന്നത് ഏതാണ്ട് പൂർത്തിയായെന്ന്' മുൻ ചെൽസി താരം ചാനലിൽ സംസാരിക്കുന്നതിനിടെ പറഞ്ഞു.
നേരത്തെ അസ്പിലിക്യേറ്റയോട് ചെല്‍സി വിടുമോ എന്ന മാധ്യമ പ്രവര്‍ത്തകന്റെ ചോദ്യത്തിന് "“ഞാൻ എന്റെ ഭാവിയെക്കുറിച്ച് സംസാരിക്കാൻ പോകുന്നില്ല. ഞാൻ ചെൽസിയിൽ എത്തുമ്പോൾ എനിക്ക് കുട്ടികളില്ലായിരുന്നു. എന്റെ കുട്ടികൾ ലണ്ടനിലാണ് ജനിച്ചത്, ചെൽസിയെക്കുറിച്ച് എനിക്ക് എങ്ങനെ തോന്നുന്നുവെന്ന് നിങ്ങൾക്കറിയാം" എന്നായിരുന്നു മറുപടി നൽകിയത്.
സമ്മറോടെ കരാര്‍ അവസാനിക്കുന്ന താരം ബാഴ്‌സലോണയിലേക്ക് ചേക്കേറുമെന്ന അഭ്യൂഹം ശക്തമാണ്. പ്രതിരോധം ശക്തിപ്പെടുത്തുന്ന ഭാഗമായിയാണ് അസ്പിലിക്യേറ്റയെ ബാഴ്‌സലോണ ടീമിലെത്തിക്കാന്‍ ശ്രമിക്കുന്നത്.
2012-ൽ മാഴ്‌സെയിൽ നിന്ന് 7 മില്ല്യൺ നൽകിയാണ് അസ്പിലിക്യൂറ്റയെ ചെൽസി സ്വന്തമാക്കുന്നത്. ചെൽസിക്കായി 458 മത്സരങ്ങളിൽ കളത്തിലിറങ്ങിയ താരം, ചെൽസി പ്രീമിയർ ലീഗ്, ചാമ്പ്യൻസ് ലീഗ്, എഫ് എ കപ്പ്, ലീഗ് കപ്പ്, യൂറോപ്പ ലീഗ്, യുവേഫ സൂപ്പർകപ്പ് എന്നീ കിരീടങ്ങൾ സ്വന്തമാക്കാൻ നിർണ്ണായക പങ്കുവഹിച്ചിട്ടുണ്ട്. താരം, ക്ലബ് ലോകകപ്പിൽ പാൽമിറാസിനെ നേരിടാനുള്ള തയ്യാറെടുപ്പിലാണ്.
Post a Comment