ഈ സീസണിന് ശേഷം പിഎസ്‌ജിയുമായി കരാർ അവസാനിച്ച് ഫ്രീ ഏജൻ്റാകുന്ന മുന്നേറ്റ താരമായ ഡി മരിയ സീരി എ വമ്പന്മാരായ ജുവെന്റസിലേക്ക് ചേക്കേറാനൊരുങ്ങുന്നു. ഒരു വർഷത്തെ കരാറിലാണ് താരം ജുവെന്റസിലേക്ക് ചേക്കേറുന്നത്, ഒരു വർഷത്തേക്ക് കൂടെ നീട്ടാനുള്ള ഓപ്ഷനും കരാറിൽ ഉൾപ്പെടുത്തിയിട്ടുണ്ട്. കഴിഞ്ഞ ഏഴ് വർഷമായി താരം പിഎസ്‌ജിക്കായി ബൂട്ടുകെട്ടുന്നുണ്ട്.
പിഎസ്‌ജിക്കായി നിരവധി കിരീടങ്ങൾ നേടിയ താരവുമായി ഒരു വർഷത്തേക്ക് കൂടി കരാർ പുതുക്കാനുള്ള ക്ലോസ് പിഎസ്‌ജിക്ക് ഉണ്ടായിരുന്നെങ്കിലും, ഏഴ് വർഷം പിഎസ്‌ജിക്കായി കളിച്ച താരവുമായി കരാർ പുതുക്കണ്ട എന്ന നിലപാടിലായിരുന്നു ക്ലബ്ബ് നേതൃതം, കൂടാതെ പരിശീലകൻ പോച്ചെറ്റിനോയുടെ കീഴിൽ ഈ സീസണിൽ പലപ്പോഴും ബെഞ്ചിലായിരുന്നു താരം.
മുന്നേറ്റ താരം ഡിബാല ക്ലബ്ബ് വിടുന്ന സാഹചര്യത്തിൽ പരിശീലകൻ അല്ലെഗ്രിയുടെ കീഴിൽ 4-3-3 എന്ന ഫോർമാറ്റിൽ കളിക്കുന്ന ജുവെന്റസിന്, ഡി മരിയയുടെ നിലവാരവും അനുഭവപരിചയവും ഗുണകരമാകുമെന്നാണ് ക്ലബ്ബ് കണക്കൂട്ടുന്നത്.
മെറ്റ്‌സിനെതിരെ പിഎസ്‌ജിക്കായി അവസാന മത്സരത്തിനിറങ്ങുന്ന താരം, ക്ലബ്ബിനെ നിരവധി കിരീടങ്ങൾ നേടാൻ സഹായിച്ചിട്ടുണ്ട്. 2015 പിഎസ്‌ജിയിൽ എത്തിയ താരം 294 മത്സരങ്ങളിൽ നിന്ന് 92 ഗോളുകളും 118 അസിസ്റ്റുകളും നേടിയിട്ടുണ്ട്.
Post a Comment